عبد الرحمن الابنودى

عبدالرحمن الأبنودي شاعر مصري ، و يعدّ من أشهر شعراء الشعر العامي في العالم العربي شهدت معه وعلى يديه القصيدة العامية مرحلة انتقالية مهمة في تاريخها.هو مكن اسرة في قرية ابنود وعاش حياة فقيرة جدا وانشا قصة عن ابن عمه الذي كان يعتبره مثلا اعلا له وهو احمد إسماعيل بطل قصته وهو محمد مصطفى ابن عمه والده كان يعمل مأذون شرعي وانتقل إلى المدينه قنا حيث استمع إلى اغاني السيرة الهلالية التى تاثر بها وكان ضليع في اللغة العربية بشهادة اساتذته وكان يسمى في الطفولة رمان من شدة حبه للرمان.

والله وشبت يا عبد الرُّحمن ..
عجّزت يا واد .؟
مُسْرَعْ؟
ميتى وكيف؟
عاد اللي يعجّز في بلاده
غير اللي يعجز ضيف.!!
هلكوك النسوان؟
شفتك مرة في التلفزيون
ومرة .. وروني صورتك في الجورنان
قلت : كبر عبد الرحمن.!!
أمال انا على كده مت بقى لي ميت حول.!!
والله خايفة يا وليدي القعدة لتطول.
مات الشيخ محمود
وماتت فاطنة ابْ قنديل
واتباع كرم ابْ غبّان
وانا لسة حية..
وباين لسه حاحيا كمان وكمان.
عشت كتير.
عشت لحد ماشفتك عجّزت يا عبد الرحمن.
وقالولي قال خَلَّفت
وانت عجوز خلَّفت يا اخوي؟؟
وبنات..!!؟
أمال كنت بتعمل إيه
طيلة العمر اللي فات؟
دلوقت مافقت؟
وجايبهم دِلْوكْ تعمل بيهم إيه؟
على كلٍّ..
أهي ريحة من ريحتك ع الأرض
يونسُّوا بعض.
ماشي يا عبد الرحمن.
أهو عشنا وطلنا منك بصة وشمة.
دلوك بس ما فكرت ف يامنة وقلت: يا عمة؟؟
حبيبي انت يا عبد الرحمن
والله حبيبي .. وتتحب.
على قد ماسارقاك الغربة
لكن ليك قلب.
مش زي ولاد الكلب
اللي نسيونا زمان

حلوة مرتك وعويْلاتك
والاّ شبهنا..؟
سميتهم إيه؟
قالولي : آية ونور.
ماعارفشي تجيب لك حتة واد؟
والاّ أقولك :
يعني اللي جبناهم..
نفعونا في الدنيا بإيه؟
غيرشي الانسان مغرور.!!

ولسه يامنة حاتعيش وحاتلبس
لمّا جايب لي قطيفة وكستور؟
كنت اديتهمني فلوس
اشتري للركبه دهان.
آ..با..ي ما مجلّع قوي يا عبد الرحمن.

طب ده انا ليّا ستّ سنين
مزروعة في ظهر الباب
لم طلّوا عليا أحبة ولا أغراب.
خليهم..
ينفعوا
أعملهم أكفان.!!

كرمش وشي
فاكر يامنة وفاكر الوش؟
إوعى تصدقها الدنيا..
غش ف غش.!!
إذا جاك الموت يا وليدي
موت على طول.
اللي اتخطفوا فضلوا أحباب
صاحيين في القلب
كإن ماحدش غاب.
واللي ماتوا حتة وحتة
ونشفوا وهم لسه حيين..
حتى سلامو عليكم مش بتعدي
من بره الأعتاب

أول مايجيك الموت .. افتح.
أو ماينادي عليك .. إجلح.
إنت الكسبان.
إوعى تحسبها حساب.!!
بلا واد .. بلا بت..
ده زمن يوم مايصدق .. كداب.!!
سيبها لهم بالحال والمال وانفد
إوعى تبص وراك.

الورث تراب
وحيطان الأيام طين
وعيالك بيك مش بيك عايشين..!!

يوه..... يا عبد الرحمن..
مشوار طولان
واللي يطوِّله يوم عن يومه يا حبيبي .. حمار
الدوا عاوزاه لوجيعة الركبة
مش لطوالة العمر.
إوعى تصدق ألوانها صفر وحمر.

مش كنت جميلة يا واد؟
مش كنت وكنت
وجَدَعَة تخاف مني الرجال ..؟
لكن فين شفتوني ..؟
كنتوا عيال.!!

بناتي رضية ونجية ماتوا وراحوا
وأنا اللي قعدت.
طيِّب يا زمان..!!

إوعى تعيش يوم واحد بعد عيالك
إوعى يا عبد الرحمن.

في الدنيا وجع وهموم أشكال والوان.
الناس مابتعرفهاش.
أوعرهم لو حتعيش
بعد عيالك ماتموت.

ساعتها بس ..
حاتعرف إيه هوّه الموت.!!

أول مايجي لك .. نط

لسه بتحكي لهم بحرى حكاية
فاطنة وحراجي القط..؟

آ.. باي ماكنت شقي وعفريت
من دون كل الولدات.
كنت مخالف..
برّاوي..
وكنت مخبي في عينيك السحراوي
تمللي حاجات.

زي الحداية ..
تخوي ع الحاجة .. وتطير .
من صغرك بضوافر واعرة .. ومناقير.
بس ماكنتش كداب.
وآديني استنيت في الدنيا
لما شعرك شاب..!!

قِدِم البيت.
اتهدت قبله بيوت وبيوت.
وأصيل هوه..
مستنيني لما أموت..!!

حاتيجي العيد الجاي؟
واذا جيت
حاتجيني لجاي؟
وحتشرب مع يامنة الشاي .؟؟

حاجي ياعمة وجيت..
لالقيت يامنة ولا البيت ..!!

عبد الرحمن الأبنودي

من شعراء العامية الذين أوجدوا لأنفسهم مكاناً في وجدان الجماهير العربية، فهو يعتبر نفسه الحارس على التراث القروي المصري.
وُلد عبدالرحمن الأبنودي في 11 أبريل 1938، بمدينة أبنود بمحافظة قنا.

المؤهلات العلمية: ليسانس الآداب، قسم اللغة العربية، جامعة القاهرة.

المؤتمرات التى شارك فيها:
- اشترك فى أكثر من 400 أمسية شعرية فى مصر.
- اشترك فى أكثر من 40 أمسية شعرية فى العالم العربى.

المؤلفات:
- له العديد من الدواوين الشعرية منها:
- الأرض والعيال، 1964، 1975، 1985.
- الزحمة، 1967، 1976، 1985.
- عمليات، 1968.
- جوابات جراحى القط، 1969، 1977، 1985، 1996.
- الفصول، 1970، 1975.
- أنا والناس، 1973.
- بعد التحية والسلام، 1975، 1996.
- وجوه على الشط، 1975، 1998.
- صمت الجرس ، 1975 ، 1985.
- المشروع والممنوع، 1975، 1985.
- المد والجزر، 1981.
- السيرة الهلالية، 1988.
- الموت على الأسفلت، 1988، 1995، 1996، 1997.
- الاستعمار العربى، 1991، 1992.
- المختارات، 1994 ، 1995، 1996، 1999.
- آخر الليل، 1998.
- الأحزان العادية، 1998.
- جمع سيرة بنى هلال كاملة على مدى خمسة وعشرين عاما وجمع نصوصها المصرية والسودانية والتونسية.
- كتب ما يزيد عن 700 أغنية.
- كتب مقالات فى شتى الأغراض: سياسية وأدبية واجتماعية فى جريدتي الأخبار والأسبوع.

الجوائز والأوسمة:
- جائزة الدولة التقديرية فى الآداب من المجلس الأعلى للثقافة، عام 2000.