يا نعناعه
و عود وارف فـ كوب ياسمين
يا ريحة الشاي
يا حفنة جمر فـ القبضه
بـ تنفضني لاظى السيره
فـ تترجرج خلاجااااتي
تـ دفي الرصرصه
فـ شتاي
و ليه يـ مايا ؟
عروش السقف هربانه
و كشفاني حيطان داري
طب أدفا..أزاي ؟
و انا جواي
تلوج ارضك
يا محروسه افتحي الشباك
ابوس شالك..
انا فـ عرضك
اجيكي منين ؟
و انا جسوري لأعتابك
جرايد نخل مشروخه
و حزمة حزن
مثقوبه شواشيها
كـ غاب الناي
كما توبي
و مكتوبي اللي حمله تقيل
و رب الكون و لو بكدب
وحشتيني
و انا الصاحي فـ احلامي
و يقظاتي المعنداني
بعيش بيكي
نفس داخل .. نفس خارج
و لسه مـ جاش
هوى منحاش
مبين الضلع و التاني
يـ خوفي اعتاد على العاده
و اضيع بـ بلاش
أقول تاني ؟؟
يا وحشاني
لا..و لله بلاش !!
و أقول لك إيه ؟
و من أمتى صبحت كليم
و انا الاخرس فـ محرابك
انا الحابي على ابوابك
بـ ملس عـ الحروف لسّه
و من أمتى
تيجيني الجرئه و تكلم
و انا الغاشيه حبابي عينيه
لما عموني حراسك
فـ وقت العتمه و الشده
راح اتوضا بـ سحّ العين
بـ ترتر نيلك الفضه
و صلي لك و صلي لي
تعود الصحبه يا مباركه
و عـ البركه
تلمي شمل بكرانا على يومنا
آ..يا يوما
فكي العقده من عـ الكيس
بـ كرباجك يا جلابه
و مين سارقك يا فرط العيش
من على كفوف الغلابه
يا بلدنا
ابدريني فوق غيطانك
حبه حبه
ازرعي فـ قلبي الطيابه
و حصديني فـ وقت تاني
من جديد
شكليني و علمي حسي البليد
ابجديات القرايه
و الكتابه
و التلاوه للمعاني
و المحبه و الاغاني
علميني نشيد بلادي
و عزفي الحته اللي ماتت
من فؤادي
عـ الربابه
.
.