أنت ايه عند ربنا ؟
تفتكر مكانتك إيه عند ربنا؟ عالية ولا متوسطة ولا.....
منفسكش تكون عالي؟ منفسكيش تكوني عالية؟ انت راضي بمكانة متوسطة ومش عاوز تعلى؟ طب ليه متحاولش تتقرب لربنا عشان تعلى؟
تعرف لو ربنا بعت لك ملك دلوقت وخدك لفسحة في الجنة لمدة دقيقة واحدة ورجعت تاني هيحصل لك إيه؟ هتيجي تقوم الليل كل ليلة، وهتصوم كل يوم، وهتتصدق بكل فلوسك إلا شوية تعيش بيهم، هتاكل أقل أكل، لو عندك فيلا وحديقة وعربية هتبيعهم وتتصدق بتمنهم، حتحاول تقضي كل وقتك في المسجد، هتحاول متسيبش المصحف من إيدك، كمان لو كنت رجل وشفت أجمل 100 امرأة في العالم مش هتلتفت لهم، ولو كنت امرأة وشفت أجمل 100 رجل في العالم مش هتلتفتي لهم، يا ترى ليه ده كله؟ لأنك انبهرت باللي شفته في الجنة في الدقيقة دي، لأن النعيم اللي فيها عجيب، فهيكون كل تركيزك على التقرب لربنا عشان تاخد مكانة كبيرة في الجنة.
