من طرف | الموت جبان |
لملم جميع أوراقك المتعثرة قلبك ما عادش يؤمنا في المندرة ولا عاد هيرسم للعيال الشقيانين فرحة ورود الصبر وسط القاهرة لملم جميع أوراقك المتبعثرة ف أرض الميدان واضحك في وش الموت وفوت شاهد عيان الموت جبان لملم جميع أوراقك المتبعثرة لكن ما لمش وردك السهران في أحضان الغيطان ولا ضحكتك علي زهرة البستان ولا بصمة الدم اللي ع القضبان ولا قسوة الحلم اللي بيحاول يكسر جموح الشهوة في السلطان ولا شعرك المفروض علي السجان وع السيد الموت جبان والقلب متقيد والشعر بيعيد علي الصايمين وش السما بيضحك لسحنة مين؟ وش السما بيضحك علي طلوعك واللا السما بتضحك علي الغايبين؟ الموت جبان وملايكتك واقفين شايلين ضلوعك من ايدين الناس وموضيينك من دموع حطين وأنت اللي طالع حاضن الأوجاع ومتبت الروح بين خلايا الطين الموت جبان وملايكتك مستنيين بالورد ما انت اللي قادر ترسم النجمات وانت اللي قادر تترسم ع الأرض وانت اللي قادر تحضن السماوات وانت اللي قادر ع الوجع والبرد وانت اللي قادر تصبح الفرض اللي في قلوب العيال وانت اللي قادر تتبدر وسط المحال تطرح علي شطوط الكنال فدان فرح قول كلمتك وملايكتك مستنياك بالورد والحور بالطرح والطيبين بيشاوروا بجريد البلح ع الضفتين وانت اللي ماشي ف سكتك مفرود ومرفوع الجبين الموت جبان والشعر رافع جمرتين الخوف الليلة ليلة القمر بس القمر مكسوف الليلة ليلة الخسوف الكلي والشامل الموت خطف ضحكتك والشمس مش حامل والنور بيتعامل مع الأموات مين اللي هيسب الكلاب والجات مين اللي هيبوس العيال بالليل ويمدد الاوجاع علي الكنبات الموت جبان وانت اللي سايب للسكات الحلم عاقد خيوط الضلم ومهاجر الأرض كرباج فوق ضلوع الناس والليل ملامح من وطن فاجر الموت جبان لابس هدوم تاجر وانت المهاجر من بعيد لبعيد انت اللي رافض لذة الاعياد وعيال بلادك محتاجينك عيد الموت جبان وانت السعيد بالموت روحك بترقص فوق فروع التوت وملايكتك ماشيين ورا الاتباع وبيرسمولك وردة الملكوت الموت جبان وانت السعيد بالموت وبفراق البلاد انت اللي رافض عاد واتباعه والمعروضين علي كف بياعه والمبدورين من ظلم اوجاعه ف زوايا البور الموت جبان وايديك بتفرط ع المطارح نور قلبك مهاجر واليمام ع السور والدور حيطان ساكته طب مين هيضحك تاني ع النكته اللي ما أعرفهاش؟ أو مين هيتصعب علي الأوباش؟ النيل بقاله سنين ما جاش بالطمي وانت اللي طميك زي طمي النيل بتغيب وترجع خيل علي الساحة راضع أمل من صدر فلاحه بتغيب وترجع طعم تفاحه ف أيادي الرب الموت جبان والأب نفس الأب والقلب لو وزنوه هناك هيطب هيكب روحه ف مخلة التنفيس الموت جبان والأرض للعتاريس وللأتباع للي اتنصب واحتال علي الأوضاع الأرض لملوك الضياع والقصر للي انتشي وبدل نشيد النصر وملايكتك واقفين يصلوا العصر وانت المهاجر من بعيد لبعيد لكن مازالت بين ضلوعك مصر |
سعيد حامد شحاتة
كفر الشيخ
عدل سابقا من قبل الماهر في الجمعة 27 أغسطس - 11:52:09 عدل 1 مرات
