من طرف قطر الزمان
.........................
على سكه حديد وقضبان
ماشى بيا قطر الزمان
لقيت فيه اشكال والوان
ناس فقيره وناس اعيان
فى الميعاد انا داخلته
كل واحد فإيده تذكرته
وله كرسى وله مكان
فى قطر الزمان
لقيت فيه اللى مروح
واللى رايح يتفسح
واللى همه ينام بيه
وعليه يصبح
دا ياعينى الغلبان
فى قطر الزمان
لقيت اللى عن اهله متغرب
واللى طافش متهرب
عليه تار يا ستار
داخل يتسحب
نفسه يلاقى الامان
فى قطر الزمان
لقيت اللى هاوى السفر
وفلاح وعمده وشيخ غفر
واللى معاه معاه ملايين
واللى فاقد البصر
والسليم والتعبان
فى قطر الزمان
ومشى بينا وعدى بينا
من مدينه لمدينه
جوانا الحزن مالينا
فى اى محطه يا فرحه هاتستنينا
وماشى
يخضخض فيا واقول ماشى
سهرانه عنيا منيماشى
واقول ماشى
حتى حلمى قدامى شايفه
بس ايدى ماطيلاشى
ما العين بصيره والايد قصيره
ينقطع لسانى لو جبت سيره
بأنهم.....خدوا فرشة احلامى
ونيمونى عالحصيره
وعدى النهار بطوله وجه اليل
وانا لسا مشوارى طويل
شاب طموح
لكن مجروح
بقول مواويل
للغلابه
ضلوعى ربابه
وصوتى ناى
غنى معاى
يا ليل........ غنى معاى
شجعنى
هون اللى واجعنى
قلبى سايبه
مع حبايبه
مرضيش يتبعنى
ويجى معاى
غنى معاى
يا ليل ........ غنى معاى
وانسنى
خلى طيفك يُحرسنى
ونور قمرك يضوى
وندى فجرك يروى
الحزن اللى ساكنى
بقاله زمان
وقلبت على نفسى المواجع
وبقيت بذاكر فذكرياتى واراجع
ومع كل ذكره
ببكى بحرقه
وفقلبى نار رغم ان الجو ساقع
والكل بردان
فى قطر الزمان
وقبل المحطه بلحظات
نفضت غبار الزكريات
ورجعت من التانى للواقع
اللى كله الام واهات
....................................
محمود عيد
