..بس خايف ترفضينى..

إلى من يهواها قلبى منذ الصغر :- أهديكى

( آه بحبك )
نفسى أقولها .. /
بس خايف ترفضينى
ألف حاجة جوه منى بتندهك
وألف حاجة خايفة منك
تكسرينى
تجرحى بإيدك مشاعرى
تحرقى عمرى وسنينى
تقتلى فيا اللى باقى
من كرامتى وكبريائى
تقتلى برفضك حنينى
وتقتلينى
ياما كنت بحاول ألفت إنتباهك
وأنتى شاردة
لسه فاكرك لما كنتى بالضفيرة
والفيونكة أم وردة
كنتى جنبى
كنت بحلم كل يوم أكبر فى حضنك
أصحى أشوف الشمس طالة من عيونك
شايلة من نورها فى ملامحك
سر أسرار الحياة
بس بصحى كل مرة
ألقى جنبى دمعتى
الوحيدة اللى معايا
بتأنسنى فى وحدتى
اللى بشكيلها همومى
اللى أقضى معاها يومى
أحكى عنك ../
عن وجودك
بين دروبى وذكرياتى
أحكى عن حبى اللى يمكن
يبقى أجمل ما فى حياتى
وأحكى عن فرحة لقاكى
وأحكى عن ..
خوفى وسكاتى
وأفضل أصرخ / جوه صمتى
بإسم حبك
حتى لو ذكرى
هحبـــك ...
حتى لو كدبة
هحبـــك ...
حتى لو رفضك نهايتى
برده
هشتاقلك وأحبك
________________
ياريت تسمعينى